اسفه تأخرت عليكم في الفصل الثاني
******************
" الفصل الثاني "
..*..*..*..*..(من هي ميسون؟)..*..*..*..*..
ركبوا جميعا السيارة عائدين إلى المخيم..
قطع عبد المحسن السكون بقوله: أقول خالد, أنا عارف انه ما بيننا معرفة,
بس أبقولك الصراحة, أنا أول مره أشوف علاقة زوجيه مثل علاقتك بزوجتك,
وأنا ألي اعرفه انك توك معرس, يعني ما دخلت, أكيد إنها من الجماعة وإلا؟؟
يوسف(بعد أن ضرب عبد المحسن على رأسه): أقول ليه ما تستحي على وجهك
وتناظر طريقك, ما بقى إلا البزران يتكلمون عن العرس!!
خالد وهو مبتسم: والله انتم يا شباب ما قصر توا معي, وراح أقولكم قصتي مع ميسون
من الألف إلى الياء, بس ألي ينقال بها لسيارة ما يطلع.. اوكيه؟؟
عبد المحسن متحمس: اوكيه..
يوسف ومحمد: اسلم.
خالد: سلمتوا.. أحمد يعرف القصة كلها.. القصة بدت في سوق العويس في يوم خميس
رائع..كان دوري أني افتح محل الوالد في ذاك اليوم, لأنه كان يوم إجازة الوالد,
وكنت أنا وأخواني نتناوب على الخميسات, وكان ذاك اليوم دوري..
وكان محلنا عبارة عن محل ملابس نسائية جاهزة..
جيت متأخر لم المحل, حوالي الساعة 10 الصبح, ولقيت عند المحل بنت في بداية العشرينات
, ومعها وحده اكبر منها بكثير, تبين بعدين إنها أمها,.. أول ما شافتني أفتح المحل,
دخلت هي وأمها بدون احم ولا دستور, وقبل ما انتهي من فتح البوابة والأنوار.. مشيتها,
وقلت يمكن مستعجلين, دخلت المحل, ونطيت ورى الماصة,
وثمن جتني وسألتني البنت: أنت خالد؟؟
أنا: إيه أنا خالد,
إذا كنت تبين تسألين عن البضاعة الجديدة ترى ما عندي بها علم
قاطعتني وقالت: ليش تأخرت؟؟
أنا: عفوا يا خاله, المحل محلي, وأجي متى ما بغيت.
قاطعتني مره ثانيه وقالت: أنا زبونه دايمه هنا.
أنا: تشرفنا المحل محلك, شوفي ألي يجوز لك, وادفعي سعره ,ولا توكلي على الله.
ميسون: أنت وش فيك جفس؟؟, أنا ما جيتك أشحذ..
قاطعتها أمها: ميسون؟؟.. عيب؟؟
والتفتت على (الأم) وقالت: هذا بكم يا شيخ؟؟
أنا: هذا ب70, ونعطيك إياه ب65.
ميسون: 65, تبي تلعب علينا أنت؟؟..
أنا: والله هذا مكسبه 5 ريال.. يعني ما يرضيك أبيعك إياه بخسارة..
ميسون: اجل لاعبين عليك, أنا شايفته بمحل ثاني ب50..
أنا: جيبيه لي واشتريه منك ب55.
ميسون: أنا منيب فاضيه أجيبه لك.. المهم.. طيب هذا قماشه زين وإلا خرابيط؟؟
أنا: هذا يا خاله أزين من ألي أشين منه.
ميسون: ماش أنت ما عندك علم, الله يهدي صالح ألي دلنا على محلك..
قالتها وهي تسحب أمها وتطلع برا المحل..
وأنا تذكرت إن صديقي صالح قالي إن أخته وأمه يبي يجون لم المحل, وكان يبيني
أتوصى بهم وأنا نسيت المسألة كلها فرحت أدورهم في المحلات القريبة ما لقيتهم فقررت
أني اتصل على صالح بالعصر علشان اعتذر منه بس الصراحة الاعتذار ما كان هو السبب
الرئيسي
جاء العصر, فرفعت السماعة, ودقيت رقم بيت أبو صالح, وردت علي ميسون نفسها..
على طول تذكرت صوتها..
ميسون: الو؟؟
أنا: الو؟؟ مساء الخير..
ميسون(بصوت عالي) : أنت ما تستحي على وجهك؟؟
أنا: عفوا؟؟
ميسون: أنت ما عندك أخوات تغار عليهم, ما عندك شغل إلا إزعاج العالم,
ترى رقمنا مراقب, ونبي نجيبك, وابخلي أخواني يجلدونك لين تقول بس,
ثمن بيودونك لم الشرطة تشوف شغلها معك يا لحمار.
أنا(مدري وش أقول): عفوا أختي....أنا خالد صديق صالح, صالح فيه؟؟,
ممكن أكلمه إذا ما كان فيه إزعاج؟؟.
ميسون بعد ما سكتت لحظات:اووووه.. طيب ورا ما قلت كذا من الصبح؟؟.. لحظه..
بعد شوي رد علي صالح
صالح: هلا أبو خلود.. آسف لسوء التفاهم ألي صار مع أختي قبل شوي,
يا شيخ فيه واحد حمار مزعجنا بالتلفون, مع أن ميسون ما تقصر معه, تعطيه من الحامي.
أنا: عادي يا رجال, عندنا وعندكم خير.. المهم..
أنا بغيت اعتذر منك عن ألي صار مع الأهل اليوم في المحل, الصراحة ما عرفتهم,
وطلعوا من المحل زعلانين, وأنا جبت القطعة ألي كانوا حاطين عينهم عليها,
وأبعطيهم إياها هديه من المحل.
صالح: ما فيه داعي يا رجال, وما صار إلا الخير.
أنا: عاد أنا جبت القطعة, ولا أبيك تكسفني, ومنها نشوفك يالقطوع.
صالح: دامك مصمم اجل ورا ما تجي تتقهوى عندنا الليلة؟؟.
أنا: تم, أجيك بعد صلاة العشاء.. مناسب؟؟
صالح: مناسب.
وصليت العشاء ورحت لم بيت أبو صالح.. ودقيت الجرس.. ورد علي صالح,
وقال: هلا خالد, ادخل لم الخيمة, دقايق وأجيك.
دخلت لم الخيمة... وجلست, لقيت جريدة اليوم, فتحتها.. وقعدت أقرا..
بعد شوي.. دخلت ميسون تحسبني صالح.,.,
قالت: سلام..
وأخذت وحده من المجلات وجلست..أنا تنحنحت.. بس ما انتبهت..
حسبتني صالح وأرد عليها السلام من ورا الجريدة..
قالت: ترا خويك خالد هذا شايفن نفسه بالحيل, يعني مدري من ألي معطيه الانطباع انه وسيم,
وأنا الصراحة ما ندمت أني قلت عنه انه حمار في التلفون, حتى وأنا غلطانة,
ما ادري أول ما شفته ما دخل قلبي, ويوم سألته عن قماش القطعة, قال أزين من ألي أشين منه
(قالتها وهي تقلد صوتي باستهزاء), يعني أنا ما أقول إلا الله يعين مرته عليه,
مع أنى أتمنى انه ما يصير متزوج, يعني حرام تنظلم معه مرته..
(وسكتت شوي..ثمن كملت) يعني حتى لو كان وسيم شوي, وطويل,
هذا ما يعطيه الحق انه يتفلسف على الناس, لا ويوم سألته عن قماش القطعة قال....
قاطعتها أنا بصوت عالي شوي وقلت من ورا الجريدة (وأنا ابتسم):
أزين من ألي أشين منه...
هي سمعت صوتي من هنا.. رمت المجلة, وركضت لم جوا البيت من هنا..
وبعد دقايق جاء صالح, وكان واضح انه ما عرف وش ألي صار, وأنا استحيت أقوله..
والصراحة إن طول المدة ألي كانت جالسه فيها معي بالمجلس كنت رافع الجريدة,
وكنت أحاول أني ما أناظر, بس أول ما حسيت إنها تبي تروح وهي في طريقها لم باب الخيمة
مسرعة, لمحتها.. وليتني ما لمحتها..كانت أجمل مخلوق شافته عيوني,
تصدقون يا جماعه, أني في ذيك الليلة ما نمت, كنت قاعد أصلي طول الليل,
حسيت أن اللمحة ألي ما تجاوزت ثانيه وحده, تسوى عمر كامل,
كانت لابسه قميص احمر, ورافعه شعرها, وكانت بيضاء,
لدرجة أن القميص الأحمر صار أغمق من الدم.. قعدت في ذيك الليلة أصلي وأطلب المغفرة,
لأن الذنب إلي سويته في ذيك الليلة أشعرني بسعادة غريبة مثل سعادة ألي سرق اكبر بنك بالعالم,
ولا أحد درى عنه..
وجاء وقت صلاة الفجر, وجاء لمي أبوي يصحيني, ولقاني صاحي.. بعد الصلاة,
وأنا ماشي مع الوالد من المسجد لم البيت..
قلت له: وش رأيك تصير جد؟؟
التفت علي وابتسم, وأسرع بخطواته..
قلت له: أنا أكلمك.. وراك عجل؟؟
التفت علي, وهو ما زال سريع الخطوة, وقال(وهو يبتسم): أببشر العجوز..
عبد المحسن مقاطع كلام خالد: يا شباب فيه شي غريب بالمخيم..
وكانت يده تؤشر على المخيم..