بدري حبيبي توه الجرح ما طـاب
زيدي همومي واجرحي واتركينــي
سيف ركزته وسط قلبي ولا هاب
كملي جميلك واطعني اليوم عينـي
مابي عيوني تشتكي جور الاهداب
ولابي احد غيريي يــداوي انينـــــي
ماقد طلبتك بس انا اليوم طـــلاب
وابي على كثر الرمل تكـــرهيــــني
لاني كرهــتك صدق ولانيب لـــعاب
صعبه على مثلي خيـــــانة حنينـي
يـــاما جرحتيني بلا اية اســــباب
وهــالمره عاد اقول لا تحتــرينــــــي
لاتحتري قلب شكى الضيم منصاب
تعب يذوق من القــهر ما يجيـــــني
جرح الكرامه ما هوب جرح كــــذاب
عند الكـــرامه ابيع حتى ضنـــينـــي
عودت انا نفسي على جلد وعطاب
لامن قصرت يمناي بقــطع يدينـــــي
نفسي عزيزه لو هو العشق غلاب
ماهنت انا نفــسي وتشهد يميــني
قلتي لي انساني أنا اقول بتــــــراب
بتــراب ابيعك دام بعتي سنـينــــــي
خلاص روحي لعنبو قلب ما تـــاب
روحـــي لهوى غيري وغيـرك يبيـــني
الحين روحي واقفلي بعدك الباب
ابكـي على نفسـك وبعدين ابكينـــي!!!