,,, الســلام عليكم ورحمة الله وبركاتــه ,,,
.: المشهد الاول :.
ساره: يبه أبي اروح للسوق
الأب: وأنا وش علي منك.. هذا اخوانك عندك.. روحي قولي لهم
===
.: المشهد الثاني :.
(تروح سارة لاخوها الصغير بدر )
ساره: بدر ممكن يعني تتكرم وتوديني السوق ؟ والله ضروري
بدر: يوووووووووه فاضي لك انتي مشغول!!
سارة: بدر تكفى ..والله بروح أتقضى للعيد ..مايمديني الحين معد بقى عليه الا 3 اسابيع
بدر: قلت لك مشغووول>>يضغط عالكلمه
(يدق جوال بدر)
بدر: هلاااااااااااا والله بابو حميد ..وينك يارجال ..عاش من سمع هالصوت...(!)
وشلون .. تبي تشوفني الحين ابشر ...؟؟ ما طلبت شي لا ..لا ..يارجال لامشغول ولا شي>> شف النذاله وهو توه يقول لاخته اني مشغول
(يطلع بدر من غرفته ومعه غترته..عشان يروح لصديقه)
بدر يكلم ساره: يله اطلعي برا الغرفه بقفلها انا طالع الحين>>كن فيها كنز
ساره: طيب خذني على طريقك
يقاطعها : اقووووول والله غلطان اللي يعطيكم وجه >>أي وجه ابي افهم!!
(يمشي بدر بسرعه ويركب سيارته ويروح)
===
.: المشهد الثالـث :.
( تروح ساره لاخوها الكبير عبدالله )))
ساره: عبدالله ..توديني للسوق؟؟
عبدالله: سوير..انتي عارفه اني مالي دخل بهالسوالف..روحي قولي لاخوانك>>وانت وشو؟اخو الجيران مثلا!!
===
.: المشهد الرابــع :.
(( ترجع ساره لابوها ))
ساره: يبه شف عيالك والله يطفشون الواحد..يعني اطرهم السوق؟؟
الاب: قلتيلهم كلهم وعيو؟؟
ساره: قلت لبدر وعبدالله
الاب: طيب شوفي أخوك نايف ..توه جاي للبيت ..حاولي فيه وان شاالله انه بيوافق
===
( تروح ساره الطراره>> عفوا المسكينه لاخوها نايف وهي تقول في نفسها.: لا نايف حبيب ..ومحد في البيت يفهمني كثره..ان شاء الله ربي يطرح فيه البركه ويوديني )
ساره: نيوفي ..يا بعد هالدنيا ..وش رايك لو نطلع الحين للسوق..منها نتمشى ومنها انا نغير جو..<<تقوله كذا ..عشان نايف رومنسي ويحب الكلام الحلو
نايف: اممممممممممم ..والله فكرة ..حتى انا مليت من طلعات الشباب..بس ابي افهم شي واحد ..انتو يالحريم وشوله تحبون السوق؟؟
ساره: انا ما احبه بس..تعرف العيد قرب ..وابي ابدا من الحين موب زي العام..انزنق على اخر شي
نايف: يله..يله..رحمتك ..روحي البسي عبايتك وانا بألبس ثوبي
(ساره من كثر فرحتها قامت باست اخوها)
وهي تقول: صدق؟؟>>كنه بيوديها الجنه
نايف: ايه يله بس بسرعه
(ساره وهي تروح ..نايف يطالع اخته وشلون فرحانه ..وتخنقه العبره>>اما سعودي وتخنقه العبره على اخته ..كثرو منها
خخخخخخخخخخخخ
لبست ساره باسرع وقت وطلعت هي واخوها
وعند الباب ..دق جوال نايف
نايف: هلابك.........انت عند الباب؟؟..............ايه هلا والله فيك..حياك الله ...يله ..يله دقيقه وافتحلك
نايف: يووووووووه معليش سوسو..مواعد واحد من الشباب.. ونسيت ما اقول لك ..يله بسرعه..هو عند الباب.. روحي للمطبخ جهزي القهوه والشاهي على بال ما اقلطه..بسرعه لا تتاخرين علي بالقهوه
( راحت ساره المسكينه..وفصخت عبايتها ..ودخلت المطبخ..تسوي لاخوها اللي طلبه !! )وهي تقول في نفسها:؟؟؟ ماادري المهم انها زعلااانه
====
^
^
^
^
^
كل هذي مقدمه
الزبده في الموضوع
/\
/\
تعامل الاخ مع اخته في مجتمعنا ..كيف تقيمونه..!!
هل انت راضي عن تعاملك مع خواتك .وانتي بعد راضيه عن تعامل اخوك معك؟؟؟
هل تعطي اخواتك حقهم من وقتك وتجلس تدردش معهم ولا لا؟؟
انتي كأخت وانت كأخ ..هل لديك احد من اخوانك قريب لقلبك اكثر من غيره..والا كلهم سوا؟؟
الموضوع مطرورح للنقاش واتمني الجميع التفاعل معه
اعجبني وحبيت انكم تشاركوني بأرائكملان الاخوان نعمه عظيمه من الله
,,,,,,,,,,,,,,,,,,,,,,,,,,,,,,,,,,,,,,,,,,,,,,
الإهداءات
06-03-2008, 04:06 PM
بصراحــة كيف تتعامل مع أختكـ ؟؟ 
